Filippense 4: 4 en 6
Wees altyd bly in die Here! Ek herhaal: Wees bly! Moet oor niks besorg wees nie, maar maak in alles julle begeertes deur gebed en smeking en met danksegging aan God bekend.
Daar is altyd dinge in die lewe wat met ons gebeur en waarvan ons graag wil wegkom. So hanteer ons die een na die ander kwessie. Sodra die een afgehandel is, skuif daar net weer ’n ander bekommernis of frustrasie in sy plek. Iewers is daar altyd ’n verhouding wat skeefloop en wat herstel moet word. Dinge bou gewoonlik op tot op ’n punt waar dit vir ons nodig raak om van alles weg te kom sodat ons emosionele energie kan herstel.
Hierdie teks vertel van ’n lewe wat nie van omstandighede wegvlug nie, maar op betekenisvolle maniere daarbinne kan leef. Meer nog, dit vermaan ons om altyd te midde van hierdie omstandighede bly te wees. Hoe absorbeer ’n mens al die emosies en ervaringe wat die vermoë het om ons en ander mense van stryk te bring? Ons word in die teks aangemoedig tot ’n daaglikse roetine waar ons al ons bekommernisse en uitdagings in gebed na die Here toe bring.
Hoe help dit ons prakties? Elke keer as ons dit doen, word ons deur God herinner aan groter realiteite en maniere waarop Hy ons in staat stel om situasies te hanteer. Wees bly, is dus nie ’n nou-en-dan-ervaring as alles goed verloop nie. Dit is ’n deel van die alledaagse lewe waartoe die Here ons in staat stel. Mag hierdie vrede vandag weer van jou lewe besit neem en jou aanmoedig om oor niks besorg te wees nie, maar in alles jou begeertes deur gebed, danksegging en smeking aan God bekend te maak.
Gebed
Here, dankie dat ek, te midde van die spanning, hartseer, bekommernis en frustrasies in my lewe, by U vrede kan vind. Dankie dat U dieper as my woorde kan sien en van my emosies en denke besit neem. Stuur my denke om my vandag by perspektiewe uit te bring wat my kan help om besluite te neem. Amen.
Ds Lisa-Mari Prinsloo, Centurion-Oos
