Kolossense 1: 15-20
Tydens die Tweede Wêreldoorlog is ’n fabriek waar gevangenes gedwing is om te werk, in ’n lugaanval vernietig. Om die werkers besig te hou, het die mense in beheer die verskriklike plan bedink dat die werkers die puin van een kant na die ander, heen en weer, moes verskuif. Kort voor lank het heelwat van die werkers totaal moed opgegee. Hulle wou nie meer lewe nie.
Om sinvol te lewe, moet ons weet wat op aarde ons hier maak. In Kolossense 1 staan geskryf: God het alles in die heelal deur sy Seun geskep. Alles is deur Hom en vir Hom geskep. Die Here ons God is die oorsprong van alles. As ons dus die rede vir ons bestaan wil weet, sal ons by God moet gaan leer. Ja, ons is hier om God te verteenwoordig, die aarde te bewerk en te bewaar. Ons is hier om God te loof en te eer. As ons mooi oor al hierdie dinge dink, moet ons verslae erken dat God baie maklik sonder ons kan klaarkom. Die aarde sal ’n natuurparadys wees sonder ons! En die engele sal vir seker God beter kan loof en eer as wat ons kan doen.
Nou wat is die antwoord?
Liefde loop soos ’n goue draad deur die Bybel. God is liefde. God het ons gemaak om ons lief te hê! Liefde loop egter altyd die risiko dat dinge kan skeefloop, en dinge het skeefgeloop met die mens. Omdat God liefde is, kies Hy om die vrede te herstel. Hy stuur sy geliefde Seun om ons straf te dra. God het besluit om met sy volle wese in Hom te woon en om deur Hom alles met Homself te versoen.
Wat op aarde maak ons hier? Slegs as ons God se liefde leer ken en Hom ook lief het, sal ons die antwoorde weet.
Gebed
Liefdevolle Here, ek erken vandag dat alles deur U en vir U geskep is. Dankie dat U my liefhet en dat ek ook vir U lief kan wees. Amen.
Ds Stephan Botha, Rustenburg-Suid
