Lukas 23: 34 en 24: 6
Ons almal ken die uitdrukking: Dit klink té goed om waar te wees. Daar is baie dinge vandag wat te goed is om waar te wees, byvoorbeeld beloftes wat voor ’n verkiesing gemaak word, advertensies wat gewigsverlies waarborg, ensovoorts.
Met Paasfees is daar ook wonderlike aanbiedings wat vir baie dalk ook té goed klink om waar te wees. Maar wat maak hierdie aanbiedings so anders? Die antwoord is eenvoudig: Jy kan die Een wat dit maak, vertrou. Hierdie offers wat die Here aan ons maak, kom na ons toe – gratis en verniet – want sy genade het reeds die koste gedek.
Die eerste offer wat Jesus maak, maak Hy vanaf die kruis toe Hy gesê het: Vader, vergeef hulle, want hulle weet nie wat hulle doen nie (Luk 23: 34). Die offer van vergifnis. Die offer dat jou verlede vergewe kan word.
Die tweede offer is dat ons ook sin en betekenis vir vandag vind. Met die kruis kom sê God onomwonde vir ons hoe kosbaar ons vir Hom is. Hy dink die wêreld van jou. Indien jy daaraan twyfel, oordink dan net vir ’n oomblik wat Hy gedoen het om jou liefde te wen. Dink net hoe ver God gegaan het om jou hart te wen. Ek het onlangs die geleentheid gehad om met die beste gemeente ooit te kon praat. Dit was ’n klomp voorskoolse kleuters by die kleuterskool. Ek het aan hulle die boodskap van die kruisiging probeer oordra. Ek het hulle gevra hoe lief hulle dink die Here hulle het. Hulle het dadelik hul armpies wyd uitgestrek so ver as wat hulle kon. Ek sê toe dat Hy hulle so lief het en om seker te maak ons vergeet dit nie, het Hy sy hande in plek laat vasspyker.
Derdens word aan ons die offer gemaak van hoop vir die toekoms. As gevolg van die leë graf, weet ons dat hierdie lewe nie al is wat daar is nie. Jesus het eens en vir altyd die dood verslaan.
Ds Janine Bevolo-Manders, Witfontein
