Markus 6: 14-15 en 8: 27-30
Sy Naam het bekend geraak. Onthou, ons is besig om so ’n bietjie te kyk na die probleme en sukses wat Jesus gehad het om dit bekend te laat word dat Hy die Christus, die Gesalfde en die Vleesgeworde Woord is wat God beloof het.
Ook sy dissipels word tot ’n antwoord gedwing. Jesus vra dan direk: Maar julle, wie, sê julle, is Ek? Die antwoord is: Die Christus (Mark 8: 29), wat beteken die Gesalfde.
Daar was al pogings om Jesus dood te maak. Lukas 4: 29: … om Hom van die krans af te gooi. Maar ondanks die teenkanting oor die leer wat Hy verkondig, hoor ons al hoe meer van sy sukses. Sy Naam en leer word meer en meer bekend. Dit begin versprei, selfs tot in Herodes se paleis. Die suurdeeg van hierdie NUWE leer het onder die volk en die dissipels begin deurwerk.
Kan ons ons werklik die frustrasie en magtelose woede van die Fariseërs, Joodse Raad, die skrifgeleerdes en wetgeleerdes indink? Hy en die leer wat Hy verkondig, hou ’n bedreiging vir hulle in. Daarom moet daar van Hom, Jesus, ontslae geraak word, want, in hul woorde (Luk 23: 5): Die hele Joodse land deur stook hy die volk op met sy leer.
Planne word beraam om Hom dood te maak. Omkoopgeld word in die geheim betaal om Hom te verraai, maar die saad is gesaai en dit groei. God se koninkryk, die vervulling van sy Woord, is stadig maar seker besig om ’n werklikheid te word en niks en niemand kan dit stuit nie. Vergeefs die hel se woede. Niks kan dit stuit dat Hy as die Profeet en as die Koning erken word nie. In Hom, Jesus Christus, het God se beloftes waar geword. Deur minagting, miskenning en gevaar het Hy volhard. Lees ook Johannes 17: 1-8.
My vraag aan jou, medegelowige, is: Dink mooi na oor wat jy met jou woorde, gedagtes en dade versprei. Jou suurdeeg.
Ds Hennie Aucamp, Emeritus (25/02/1949 – 04/10/2024)
