1 Johannes 4: 7-21
Die meeste van ons sukkel om die begrip liefde ten volle te begryp. Selfs in Jesus en Johannes se tyd was dit so. Die woord liefde (agape) kom 29 keer in hierdie kort verse voor. Dis duidelik waaroor hierdie verse gaan. Liefde. Ongelukkig is liefde nie die enigste woord wat herhaaldelik genoem word nie. Phobos word ook ’n paar keer herhaal, wat in Afrikaans vertaal word met vrees. Dit is waar ons woord fobie vandaan kom.
Waar liefde is, is daar geen vrees nie, maar volmaakte liefde verdryf vrees (1 Joh 4: 18). Ons sou hierdie ook kon omdraai: vrees verdryf liefde. Dit verhoed dat ons regtig uitreik na ander, dat ons ons lewens oopmaak vir ons naaste. Dit maak dat ons nie eens mense in nood kan help nie, want ons is bang vir ons eie veiligheid. Dit maak nie saak wat God sê nie, die vreemdeling is die vyand. Want ons is bang. Maar God se liefde, soos deur Jesus getoon, het die krag om hierdie vrese te verdryf. Daar word gesê: Volmaakte liefde verdryf vrees; en omgekeerd kan volmaakte vrees liefde verdryf. Hierdie vrees maak ons dikwels bang om ons werklik teenoor ander oop te maak en hulp aan te bied. Dit kan ook veroorsaak dat ons onvriendelik of onbeskof optree omdat ons bang is.
Die teks herinner ons daaraan dat God se liefde deur Jesus aan ons geopenbaar is. Hierdie liefde, wat Jesus beliggaam, het die krag om ons wêreld te verander. Niks kan ons van hierdie liefde skei nie, soos in Romeine 8 geskryf staan. Ons word aangemoedig om in hierdie liefde te bly en dit uit te leef, wat nie net ’n vae idee is nie, maar ’n praktiese opdrag. Die mekaar-tekste van die Bybel – soos om mekaar lief te hê, mekaar te dien, in vrede te leef – help ons verstaan hoe om hierdie liefde in ons daaglikse lewens toe te pas. Hierdie liefde het die potensiaal om nie net óns lewens te verander nie, maar ook die lewens van diegene rondom ons.
Ds Gustav van Zyl, Phalaborwa