’n Gholfdag gaan natuurlik oor goeie houe, ’n paar minder goeie houe en hopelik ’n paar voëltjies op die telkaart. Drive for a child ten bate van Rata gaan egter oor veel meer as wat op die gholfbaan gebeur. Dit is ’n geleentheid waar mense bymekaarkom om verhoudings te bou en terselfdertyd ’n waardevolle saak te ondersteun. Juis hierin lê dié dag se besondere betekenis: ontspanning en betrokkenheid kan hand aan hand loop, terwyl ’n dag van sport ’n geleentheid word om betekenisvol in ander se lewens te belê.
Rata se werk herinner ons daaraan dat die Kerk se roeping nie net binne die mure van ’n kerkgebou uitgeleef word nie. Ons geloof kry hande en voete wanneer ons na mense omsien, wanneer ons ondersteun waar daar nood is en wanneer ons bereid is om saam verantwoordelikheid vir mekaar te dra. Die Gholfdag skep daarom ’n ruimte waar sakeondernemings rondom ’n gemeenskaplike doel kan saamkom. Of die dag nou ’n persoonlike beste telling oplewer of eerder ’n paar balle wat van die baan af verdwyn, bly die belangrikste telling uiteindelik die verskil wat saam gemaak word. Sulke geleenthede herinner ons ook aan die waarde van vennootskap. Geen bediening, organisasie of gemeenskapsinisiatief funksioneer in isolasie nie. Wanneer mense hul tyd, vaardighede, finansiële ondersteuning en netwerke saambring, word moontlikhede geskep wat veel verder strek as wat ’n enkele persoon alleen sou kon bereik.
Rata betuig daarom opregte waardering teenoor elke speler, borg, organiseerder en ondersteuner wat die Rata-gholfdag op 20 Augustus vanjaar moontlik gemaak het. Dankie aan elkeen wat keer op keer bereid is om betrokke te raak en daarmee te sê: Die welstand van ander maak vir ons saak! Dit is te danke aan julle dat Rata vanjaar R153 300 vir kinders kon insamel! Soms begin ’n betekenisvolle verskil met iets so eenvoudig soos ’n gholfstok in die hand en ’n groep mense wat saamstap en besluit om ’n goeie saak te ondersteun.
(Ds Iwana Kruger is die NHKA-joernalis en leraar van Gemeente Pretoria-Oos)
