Romeine 8: 15 (AFR2020)
Julle het immers nie ’n gees ontvang wat weer tot slawerny lei en julle bang maak nie, maar julle het die Gees ontvang wat ons tot kinders van God maak. Deur Hom roep ons: ‘Abba! Vader!’ (Rom 8: 15).
Een van die kragtigste beelde van redding in die Nuwe Testament is aanneming – God maak ons deel van sy huisgesin. Paulus skryf: Julle is nie meer slawe nie, maar kinders. En julle kan God aanspreek as ‘Abba! Vader!’
Hierdie vers spreek direk tot elkeen wat al ooit verwerp is, alleen gevoel het of gesmag het na aanvaarding. Die Gees wat God gee, bring nie vrees nie – Hy bring vryheid, liefde, en ’n nuwe identiteit: kind van God.
Die woord Abba is intiem – soos Pappa. Dit wys dat die verhouding met God nie meer formeel en gemotiveer deur vrees is nie, maar naby en liefdevol. Vir iemand wat sonder ’n pa grootgeword het – of met ’n vader wat afwesig, onbetroubaar of selfs gewelddadig was – is hierdie ’n genesende woord: Jy mag God Pa noem.
En dis nie net ’n teorie nie – dis ’n ervaring. Die Heilige Gees bring binne-in ons ’n wete dat ons nie meer alleen is nie. Ons is nie meer geestelike weeskinders nie. Ons is in die familie van God, met ’n erfdeel, ’n toekoms en ’n naam.
Hierdie vers is ook ’n oproep tot verantwoordelikheid. As jy nou ’n kind van God is, leef soos iemand wat weet aan Wie jy behoort. Dit is nie ’n las nie – dis ’n vreugde! Jy hoef nie meer jou identiteit te soek in mense of prestasie nie. Jy het ’n Vader wat jou liefhet en dit verander alles.
As jy vandag nog met die letsels van vaderloosheid leef – of selfs met ’n goeie pa, maar tog ’n innerlike leegheid – dan sê Romeine 8 vir jou: Jy is aangeneem. Jy is geliefd. En jy het ’n Vader wat nooit sal wegstap nie.
Ds Milankie van der Walt, Namib-Suid