Jesaja 40: 28 (AFR53)
Hierdie vers is deel van ’n groter gedeelte waarin die profeet Jesaja God se grootheid en krag beskryf om die moed en hoop van sy volk te versterk. Die volk van Israel was in ballingskap en het gevoel dat God hulle vergeet het. Jesaja herinner hulle dat God altyd by hulle is en dat sy krag en wysheid oneindig is. Die vers begin met ’n retoriese vraag: Weet jy dit nie? Of het jy dit nie gehoor nie? (vers 28). Dit is ’n beroep op die volk se kennis van God en sy werke. Dit is asof Jesaja sê: Jy behoort dit te weet, want God stap al so lank ʼn pad met ons, sy volk.
Jesaja beskryf God as die ewige God, die Here. Hierdie beskrywing benadruk God se tydlose aard. Hy is die begin en die einde, die Alfa en die Omega. Daar is geen oomblik in tyd waar God nie bestaan het nie, en Hy sal nooit ophou bestaan nie. God word ook beskryf as die Skepper van die eindes van die aarde. Dit herinner die volk daaraan dat alles wat hulle sien en ervaar, deur God geskep is. Hy het die hele heelal gemaak en alles daarin is onder sy beheer. Een van die belangrikste dele van hierdie vers is die verklaring dat God nie moeg of mat word nie. Anders as mense, wat beperkte energie en uithouvermoë het, het God geen perke nie. Hy is altyd kragtig, altyd aktief, en sy energie word nooit uitgeput nie.
Laastens sê Jesaja: Daar is geen deurgronding van sy verstand nie. Dit beteken dat God se wysheid en insig onbeperk is. Hy verstaan alles, van die kleinste dingetjie tot die grootste raaisels van die heelal. In tye van swaarkry en twyfel, herinner Jesaja 40: 28 ons aan die oneindige krag en wysheid van God. Dit moedig ons aan om op Hom te vertrou, want Hy is die ewige, almagtige Skepper wat nooit moeg word nie, wat alles verstaan en ʼn pad saam met sy kinders stap.
Ds Gustav van Zyl, Phalaborwa