Johannes 14: 15-26
Johannes skrywe dat God uit liefde vir die wêreld handel. Hy stuur sy Seun om die wêreld uit die greep van verlorendheid te red. God het gereeld mense na sy volk gestuur: Moses, die rigters, priesters, konings, profete, apostels. Met die Christus was dit egter anders. Jesus is die unieke (enigste) Seun van God (Joh 1: 14). Daar bestaan ’n unieke verhouding tussen die Seun en die Vader. Die Christus en die Vader is Een. Jesus Christus is nie maar net in die gang van mensegeskiedenis geskep nie, maar bestaan van ewigheid tot ewigheid. Hy is nie net een met God nie; Hy is Self ook God.
Johannes beskrywe die Christus as Woord van God. God stuur Hom om die Vader bekend te maak. Dít is die wil van die Vader wat My gestuur het: dat Ek van almal wat Hy My gegee het, nie een verlore sal laat gaan nie, maar hulle almal op die laaste dag uit die dood sal laat opstaan (Joh 6: 39). Van nature glo ons nie God se goeie nuus nie. Ons wil eerder ons eie redder wees. Van nature glo ons nie in die goeie God wat Christus as Gawe aan ons skenk nie.
Die Bybel leer ons dat die Heilige Gees die Goddelike Persoon is wat die verlossingswerk van die Christus neem en in die harte en lewens van gelowiges inbring. God die Heilige Gees is die Een wat die verlossingswerk van die Christus deur die loop van al die eeue, weer teenwoordig stel en tot eiendom maak van elke gelowige.
Jesus sê: Dit het Ek tot julle gespreek terwyl Ek by julle bly; maar die Trooster, die Heilige Gees, wat die Vader in my Naam sal stuur, Hy sal julle alles leer en sal julle herinner aan alles wat Ek vir julle gesê het (Joh 14: 25-26, AFR33).
Die Gees as Trooster. Wanneer ons in sak en as sit oor die stukkendheid van ons sondige bestaan, troos die Gees ons dat in die Christus daar vergewing van sondes en die gawe van nuwe lewe is.
Die belangrikste gawe van die Heilige Gees is die gawe van geloof in Jesus Christus, ons Here.
Ds André Thomas, Oos-Moot