Daar is ’n bekende gesegde wat lui: Aanhouer wen. In hierdie eenvoudige woorde skuil ’n dieper waarheid. Ons weet dat vaardighede nie oornag aangeleer word nie, hetsy dit sport, musiek, handwerk of enige ander stokperdjie is. Dit verg deursettingsvermoë, oefening en die moed om aan te hou, selfs wanneer dit ’n groot uitdaging is. Die beloning lê dikwels nie net in die eindresultaat nie, maar in die groei en selfvertroue wat langs die pad ontwikkel.
Met hierdie gedagte as vertrekpunt, het Lené Prinsloo, ’n arbeidsterapeut, op 9 Junie ’n sessie wat fokus op aandag en balans by Ons Tuis Machteld Postmus aangebied. Ongeveer 15 inwoners het in die sonkamer byeengekom, gereed om die paadjies in hul breine te stimuleer, hul koördinasie te oefen en hul vaardighede op ’n prettige manier skerp te hou.
Die atmosfeer was gevul met konsentrasie en baie gelag. Inwoners moes verskeie oefeninge aanpak wat balans, fokus en samewerking vereis het. Een van die uitdagings was om ’n bal op ’n skinkbord te balanseer, maar nie net terwyl hulle stil staan nie, ook wanneer hulle loop! Soms het die bal sy eie koers gekies wat tot groot vermaak van almal gelei het. Tog was die belangrikste nie óf die bal perfek gebalanseer is nie, maar dat elke deelnemer bereid was om weer te probeer.
Wat hierdie oggend besonders gemaak het, was die ondersteunende gees onder die inwoners. Daar was bemoedigende woorde en opregte vreugde wanneer iemand ’n uitdaging suksesvol voltooi het. Hierdie oomblikke herinner ons daaraan dat veroudering nie beteken dat groei en ontwikkeling ophou nie. Inteendeel, dit wys dat mense op enige ouderdom kan ontwikkel en nuwe uitdagings kan aanpak. Sulke aktiwiteite speel ook ’n belangrike rol in die bevordering van geestelike en fisiese welstand. Deur die brein aktief te hou, vaardighede te oefen en sosiale kontak te bevorder, word inwoners bemagtig om met selfvertroue en waardigheid hul latere lewensjare te geniet. Elke oefening, elke laggie en elke klein oorwinning dra by tot ’n gevoel van betekenis en selfwaarde.
Dié inisiatief, deur suster Sonja Stander, bestuurder van Ons Tuis Machteld Postmus, getuig van haar betrokkenheid en haar diepe verbintenis tot die welstand van die inwoners. Hierdie geleentheid het weereens beklemtoon dat Ons Tuis Machteld Postmus veel meer as net ’n woonplek is. Hierdie is ’n gemeenskap waar inwoners gekoester, ondersteun en bemagtig word om aktief aan die lewe deel te neem.
Ouderdom is nie ’n beperking nie, maar ’n nuwe fase waarin mense steeds kan groei, leer en floreer. Die glimlagte in die sonkamer tydens dié sessie was ’n kragtige voorbeeld hiervan. Wanneer mense aangemoedig word om aan te hou leer en aan te hou leef, weerklink die ou gesegde: Aanhouer wen.