Emerituspredikant ds PJJ (Pierre) Kotzé (74) is net voor 15:00 Saterdag 9 Maart oorlede.
Ds Kotzé het middel Januarie ’n operasie ondergaan waartydens ’n hartomleiding gedoen en ’n hartklep herstel is. Hy het aanvanklik goed aangesterk en is van die St George-hospitaal in Port Elizabeth na die Aurora-rehabilitasiehospitaal oorgeplaas. Daar het hy ongelukkig longontsteking en infeksie opgedoen en is teruggeplaas na die St George-hospitaal, waar hy geleidelik verswak het.
Ds Kotzé is op 9 Januarie 1977 georden en het gedien in Krugersdorp-Wes, Potgietersrus-Wes en Piet Potgieter. Hy het in 2012 siekte-emeritaat aanvaar, en in 2015 emeritaat. Hy en sy vrou, Maryna, het in Jeffreysbaai gewoon, en hy was ’n ouderling in die gemeente. Hy het tot ’n jaar gelede nog gereeld eredienste in Jeffreysbaai en Port Elizabeth waargeneem.
Sy roudiens op Woensdag 13 Maart vanuit Gemeente Jeffreysbaai is gelei deur ds Denise Schmidt, predikant van die samewerkende gemeentes Port Elizabeth en Jeffreysbaai. Ons innige simpatie gaan aan mev Maryna Kotzé en hul familie.
