Ds Elizabeth Rossouw is op kerkkampe bekend vir haar kookvernuf, maar sy het ook onlangs die koppe laat draai met haar nuwe stokperdjie. Draf wakker deesdae haar energie en entoesiasme aan. Draf is ’n manier waarop sy onlangs haar roetine begin opkikker het en ’n aspek van haar lewe wat altyd onvoorspelbaar is. Dit is juis hierdie onvoorspelbaarheid wat haar werk as predikant in die Hervormde Kerk opwindend maak. Sy vertel dat haar verantwoordelikhede nie elke dag dieselfde lyk nie en dit hou haar nuuskierig en opgewonde vir wat elke nuwe dag mag inhou.
Sy is reeds sedert 2020 as eerstejaar by die Universiteit van Stellenbosch onder die mentorskap van dr Chris le Roux gevorm en gelei. Dit was ook dié mentor wat ’n impak op haar beroepskeuse gemaak het. Sy noem dat haar roeping in die amp van predikant haar aanvanklik onkant gevang het: Ek het dan nie soos ’n tradisionele predikant in my kop gelyk nie? Maar ná dr Le Roux se aanmoediging om teologie te studeer en hierdie avontuur aan te pak, het sy uiteindelik die sprong gewaag. Vandag getuig haar lewe van hoe sό ’n roeping transformerend kan wees.
Vir die afgelope paar jaar het sy haar tuiste by die Gemeente Stellenbosch gevind, waar sy ook as skriba van die Ringskomitee vir Predikante van die Wes-Kaap gedien het. Danksy hierdie verantwoordelikheid het sy diep bande met predikante in die ring opgebou. Hierdie predikante het as haar kollegas deel gevorm van die handopleggingsgeleentheid tydens haar ordening op 14 Desember 2025. Sy beskryf dit as ’n besondere en betekenisvolle ervaring saam met hulle.
Alhoewel Stellenbosch nou haar tuiste is, lê haar wortels verder noord. Ds Rossouw is in Walvisbaai, Namibië, gebore waar sy in die Hervormde Kerk grootgeword het. Daarom het sy dadelik by ’n Hervormde gemeente ingeskakel toe sy na Stellenbosch verhuis het vir haar studies. Sy het eers aansoek gedoen om ’n BCom-graad te studeer, maar het gou agtergekom dat dit nie deel vorm van die roeping wat God vir haar in gedagte gehad het nie. Sy het dikwels gewonder: Waarom is die enigste ding wat my werklik vreugde bring, om kerk toe te gaan? Ses jaar later kan sy haarself nie indink om haar lewe aan enigiets anders te wy nie. Dit is vir haar ’n groot voorreg om te weet dat ander haar vertrou om hulle in hul geloofslewe te begelei.
Sy beskryf haarself as iemand wat lief is om stories te vertel, en tans word die verhaal van haar lewe deur middel van draf uitgedruk. Dit is ’n manier waarop sy die mooi van God se skepping werklik kan ervaar. Sy vertel dat sy voorheen iemand was wat baie onaktief was, maar dat sy nou haar lewe op soveel maniere positief aangevul het. Sy het ook onlangs op 12 April 2026 aan die Twee Oseane-halfmarathon deelgeneem – ’n geleentheid wat as ’n metafoor vir haar geloofsreis dien: volharding, vertroue en genade.
Die Kerk is dankbaar daarvoor om jong predikante soos ds Rossouw te huisves en ons sien uit na die werk wat sy in die toekoms gaan verrig.