1 Korintiërs 3: 10-17
Weet julle nie dat julle die tempel van God is en dat die Gees van God in julle woon nie? (1 Kor 3: 16).
Toe die Israeliete in die woestyn gewandel het, het God in ’n tent, die tabernakel, tussen hulle gewoon. Later het Salomo ’n permanente tempel in Jerusalem gebou. Albei was plekke waar God se teenwoordigheid spesiaal ervaar kon word. Maar nou raak ons weer bewus van die feit dat óns God se tempels is!
Die kerk is nie ’n gebou met ’n toring nie. Die kerk is mense – lewende mense wat asemhaal en waarin God se Gees woon. Elkeen van ons is ’n klein tempel waar die Here wil woon. Saam vorm ons ’n geestelike gebou, ’n woonplek vir God in die Gees. Waar twee of drie in sy Naam vergader, is Hy in hul midde.
Hierdie waarheid is nie net ’n mooi gedagte nie, maar ’n radikale werklikheid. Dit verander hoe ons na onsself en na ander kyk. As God in ons woon, is ons lewens geheilig, afgesonder vir ’n heilige doel. Die manier waarop ons ons liggame en gedagtes versorg, word dan ’n saak van aanbidding.
Die belofte is duidelik: God kies om in sy mense te woon. Die uitdaging is egter net so duidelik: hoe versorg en onderhou ons sy tempel? Daar is geen behoefte aan marmerpilare of goue versiering nie, maar eerder aan suiwer gedagtes, liefdevolle woorde, en dade van geregtigheid en barmhartigheid.
Dink vandag aan jou eie lewe as ’n plek waar God woon. Watter herstelwerk benodig jou tempel dalk? Watter ongewenste dinge moet uitgegooi word? En hoe kan jy ander help ontdek dat hulle ook kosbare tempels van God se teenwoordigheid is?
Gebed
Heilige God, dankie dat U gekies het om in ons te woon deur u Heilige Gees. Help my om my liggaam en gees te versorg as ’n heilige tempel vir u teenwoordigheid. Reinig my van alles wat nie in u teenwoordigheid hoort nie. Gee dat my lewe ’n plek sal wees waar ander u teenwoordigheid kan aanvoel en u liefde kan ervaar. Amen.
Ds Henk Labuschagne, Silverton