Die tyd het aangebreek

Nadat Johannes in die tronk opgesluit is, het Jesus na Galilea toe gegaan en die evangelie van God verkondig. Hy het gesê: “Die tyd het aangebreek, en die koninkryk van God het naby gekom. Bekeer julle en glo die evangelie.”

Eendag toe Jesus langs die See van Galilea loop, het Hy vir Simon en Simon se broer Andreas gesien waar hulle besig was om werpnette in die see uit te gooi. Hulle was vissers van beroep. Hy het toe vir hulle gesê: “Kom hier! Kom saam met My, en Ek sal julle vissers van mense maak.” Onmiddellik het hulle die nette gelos en Hom gevolg.

Toe Hy ’n entjie verder gaan, het Hy vir Jakobus seun van Sebedeus, en sy broer Johannes gesien waar hulle in die skuit besig was om hulle nette reg te maak, en dadelik het Hy hulle geroep. Hulle het hulle pa, Sebedeus, net so saam met die loonarbeiders in die skuit gelaat en saam met Jesus gegaan. (Markus 1: 14-20)

Die regte tyd het aangebreek,
die tyd deur God bestem –
die Vader stuur vir ons sy Seun
as kind na Betlehem.

Vir ons gebore as ’n mens,
kom Hy in ons belang –
Hy koop ons vry, dat God ook ons
as kinders kan ontvang.

God maak ons kind en erfgenaam,
Hy stuur vir ons sy Gees.
Ons kan Hom nou ons Vader noem;
aan Hom gehoorsaam wees.

O Vader, al die lof en eer
en dank wil ons U bring;
van al u vrede, liefde, guns
sal ons vir ewig sing!

(Attie van der Colf,
Gesang 341: 1-4, Liedboek van die Kerk)

af
af
Deel met behulp van
Copy link